Ֆուտբոլային խաղի ժամանակ դաշտ ներխուժած երիտասարդի նկատմամբ բռնություն կիրառած անձն այլևս տեղ չի կարող ունենալ ոչ մի խաղի ժամանակ անվտանգության իրականացնելու համար՝ անկախ նրանից, թե ինչն է եղել պատճառը, Տելեգրամում գրել է Ազգային ժողովի նախագահ Ալեն Սիմոնյանը՝ շեշտելով՝ այս դեպքը պետք է ունենա իր կոնկրետ հետևանքները:
Ֆուտբոլի ազգային հավաքականի երկրպագուների «Առաջին հայկական ճակատ»-ի ֆեյսբուքյան էջում օրերս մի տեսանյութ էր հրապարակվել, որտեղ երևում էր, թե ինչպես է Հայաստանի Գավաթի եզրափակիչ խաղի ավարտին խաղադաշտ մտած պատանի երկրպագուին համազգեստով մի տղամարդ հարվածելով և քաշքշելով փորձում դաշտից դուրս բերել:
Ֆուտբոլի ֆեդերացիան՝ դատապարտելով տեղի ունեցածը, նշել էր, որ անչափահաս երկրպագուի նկատմամբ անհամաչափ ուժ կիրառած տղամարդը Ֆեդերացիայի անվտանգությունն ապահովող ծառայության աշխատակցիներից մեկն է՝ ընդգծելով՝ տեղի ունեցածը հակասում է խաղի կամ տոնական միջոցառման ընթացքում ֆեդերացիայի որդեգրած կանոններին ու արժեհամակարգին: Ֆեդերացիան վստահեցրել էր՝ քայլեր կձեռնարկեն, որ նման դեպքերը չկրկնվեն, խաղերն էլ անվտանգ մթնոլորտում անցկացվեն:
Ոստիկանությունը դեպքով հաղորդում է ներկայացրել Քննչական կոմիտե, բայց երեկվա դրությամբ ՔԿ-ն քրեական գործ չի հարուցել: Երեխաների իրավունքների պաշտպանության միջազգային փորձագետ Դավիթ Թումասյանի համոզմամբ, առնվազն ֆիզիկական ներգործության հոդվածով քրեական գործ հարուցելու բոլոր հիմքերը կան:
