«Տատիկների գործով» մեղադրյալ Կիմա Հայրապետյանը Գյումրիի ընտրություններից հետո վարչական հսկողության տակ է, իսկ դա նշանակում է, որ նրա ոտքին հսկողության հատուկ սարք է ամրացված, սահմանափակված է նրա տեղաշարժը: Ընտրակաշառքի համար մեղադրվող 75-ամյա կինը շատ է նեղվում դրանից, ոտքին վերքեր են առաջացել, պատմեց փաստաբան Արսեն Բաբայանը:
«Քանի որ առաջիկայում կլինի առաջիկա նիստը, որտեղ պետք է քննարկվի նաև վարչական հսկողության հարցը, հույս ունենք էդ վարչական հսկողությունը վերացնելու, եթե դա էլ չէ, ապա էդ բրասլետը հանելու», - ասաց փաստաբանը:
70-ն անց երկու տարեց կանանց ընտրությունների օրն էին ձերբակալել, երեք օր անազատության մեջ պահել, նրանք անգամ ահազանգել էին, որ ձերբակալելիս իրենց հարվածել են: Հակակոռուպցիոն կոմիտեն հերքել էր ֆիզիկական ուժ գործադրելու մեղադրանքները:
Մյուս մեղադրյալը՝ 71-ամյա Անահիտ Խալաթյանը առողջական խնդիրներ ունի: Բուժօգնություն ստանալու համար նրա ոտքից սարքը հանել են, ապա նորից ամրացրել:
Հակակոռուպցիոն կոմիտեն օրերս ավարտել է «տատիկների գործի» նախաքննությունը, դատախազը դեռ պիտի հաստատի մեղադրական եզրակացությունն ու գործն ուղարկի դատարան: Տարեց կանանց փաստաբան Արսեն Բաբայանն այսօր գործի քննությունից շատ չակերտներ բացեց, քանի դեռ չի ստացել մեղադրական եզրակացությունը: Ասաց՝ քրեական վարույթի հիմքում հեռախոսային գաղտնալսումներ են, դրանցում նախաքննական մարմինը ընտրակաշառքի խոստում է տեսել:
Անահիտ Խալաթյանը պարագայում մեկ այլ հեռախոսազանգ էլ է քրեական վարույթի հիմք դարձել: Նա տեղական ընտրություններում «Մեր քաղաքը» ընդդիմադիր դաշինքի նախընտրական ցուցակում էր ընդգրկված:
Բաբայանը պնդում է՝ «տատիկների գործում» հիմնավոր ապացույց չկա:
Ընտրակաշառքի ու ընտրության ժամանակ բարեգործության արգելքը խախտելու հոդվածով հարուցված այլ վարույթներ էլ կան, որոնք դեռ նախաքննության փուլում են:
Իսկ «Մեր քաղաքը» դաշինքը ղեկավարած ընդդիմադիր պատգամավոր Մարտուն Գրիգորյանի հոր, որդու և ևս մեկ ավագանու թեկնածուի գործը արդեն Հակակոռուպցիոն դատարանում է: Նրանք մեղադրվում են ընտրության ժամանակ բարեգործության արգելքը խախտելու համար: Դատական առաջին նիստը մայիսի 27-ին է:
Ավելի մանրամասն՝ «Ազատության» հեռուստառեպորտաժում.
